И официјално НАТО се приклучува во борбата против Исламска држава
Објавено во: Свет 25 Мај, 2017
На самитот во Брисел со учество на американскиот претседател Доналд Трамп НАТО ќе се приклучи на коалицијата предводена од САД против „Исламска држава“.
Ова го изјавил генералниот секретар на Алијансата, Јенс Столтенберг, цитиран од AFP.
„Тоа ќе испрати силна политичка порака за посветеноста на НАТО во борбата против тероризмот“, изјави Столтенберг пред почетокот на клучниот состанок во Брисел.
Секоја од земјите членки на НАТО, веќе е дел од оваа коалиција поединечно, но досега НАТО преферираше да го задржува статусот на „набљудувач“. Тоа е прилично изненадувачко решение ако се земе предвид незаинтересираноста конкретно на најголемите европски членови на НАТО - Германија и Франција, Алијансата да влегува во воени дејствија.
Средбата на држави и влади на земјите членки на НАТО започнува денес. Се очекува да бидат разгледани клучните теми како заживување на придонесот на Алијансата во борбата против тероризмот. Средбата е и деби посета во Европа на новиот американски претседател Доналд Трамп.