Има ли иднина нафтената криптовалута OilCoin?
Објавено во: Финансии 22 Јануари, 2018
OilCoin е првата така наречена нафтена криптовалута бидејќи вредноста ја базира на самата вредност на нафтата. Во таа смисла еден токен на OilCoin чини колку еден барел сирова нафта, односно вредноста на криптовалутата е одредена според вредноста на самото добро, за разлика од биткоинот чија вредност се одредува од самата побарувачка и понуда на токени, како и на трошоците на технологијата за креирање на нови токени.
Според економските експерти OilCoin може да прерасне во моќен финансиски инструмент кој би се користел за тргување на пазарите, особено кај крупните играчи кои имаат реален посед на залихи на нафта, па така со движењата на цените може да привлечат инвеститорите кои би купувале виртуелни токени со цел да направат поврат на инвестицијата при раст на цените на нафтата на берзите низ светот.
Од една страна ваквата замисла е одлична бидејќи се очекува цената на нафтата да продолжи да расте во наредниот период, па дури има прогнози и дека ќе следат неколку години со постојан раст на цената на „црното“ злато поради стабилизација на светската економија и неопходноста на вложување во енергија кај земјите во развој меѓу кои Кина, Индија, Бразил и останатите.
Сепак, со OilCoin треба многу да се внимава бидејќи вистинската вредност на оваа па и било која сегашна или идна криптовалута не лежи во тоа што е претставена со реално добро како што е нафтата, туку со подемот на технолошките иновации кои во иднина ќе ја покренуваат економијата.
Дали OilCoin е вистинската валута за таков скок во иднината, засега е рано да се каже или прогнозира, но овој и слични нови видови на финансиски инструменти кои имаат опипливи и редовни показатели мора да се следат од страна на инвесторите и стручната јавност за да се видат импликациите како на пазарот, така и на самата економија.
Х.С.