Има ли притисок од меѓународната заедница за решавање на името?
Објавено во: Македонија 23 Септември, 2017
Посредникот во преговорите Метју Нимиц, во интервју за агенцијата ИБНА по средбата со грчкиот шеф на дипломатијата, Никос Коѕиас во Њујорк изјави дека односите меѓу Грција и Македонија во последните неколку месеци значително се подобрија.
Вели дека има волја на двете страни за изнаоѓање решение за прашањето за името, кое ќе ја зајакне стабилноста во регионот.
Нимиц се надева дека ќе може да се забрзаат разговорите за името годинава, односно по локалните избори во Македонија кои ќе поминат за неколку седмици.
„Двете земји дадоа збор дека се заинтересирани тоа да се направи. Односите се подобрија во последните месеци и очекувам поголема активност“- изјави Нимиц.
Додава дека двете држави имаат свои црвени линии.
„Има многу важни прашања во двете земји, но мислам можат да се приближат“- вели Нимиц.
Посредникот не прецизира дали има притисок од меѓународната заедница, но вели дека „сите, и САД и ЕУ, се заинтересирани“ прашањето да се реши, а тој е со став дека ова прашање требало да се затвори пред години.