Италија стравува од терористички напади на џихадисти од Албанија

Добивај вести на Viber

Дневниот весник „Ла Република“ под наслов „Тероризам, знамиња на ИД се веат во албанските села“ оценува дека Албанија е нова колевка на ИД и главна закана за нивната безбедност бидејќи повратниците од Сирија може да извршат џихадистички напади во Италија базирано на информации добиени од тајните служби.

- Момчиња од селата Лешница, Загорци и Ремен, се оние од кои денес се тресе Европа. Најопасен од нив беше Алмир Даци, по потекло од Лешница, кој раководеше со џамијата во која се радикализирани многу лица. Алмир Даци, се тврди, дека загинал во Сирија, наведува весникот.

Написот поткренува сомненија дека многу Албанци живеат во регионот на Пулија и оти претставуваат ризичен фактор за жителите во тој регион.

- Еден од нив беше Ервис Алиња, кој уште како дете емигрирал со своето семејство во Пулија. Пред извесно време тој се врати во Албанија каде се радикализира и замина за Сирија каде е и убиен, наведува весникот.

Но, не само толку, бидејќи радикализираните Албанци, според весникот, доаѓаат и од југоисточниот дел на Албанија. Во написот се наведува дека тие се експоненти на албаскиот криминалитет, кој е активен  во подрачјето на Бари во недозволената трговија со оружје и дрога.

Исто така весникот тврди дека повеќе џихадисти Албанци имаат силни врски со лидерот на ИД Ал Багдади.

Одговарајќи на многуте коментари на граѓани на неговиот профил на Фејсбук, албанскиот премиер Еди Рама написот го оценува како голема лага.

- Тоа е една голема лага, но што да се прави, така оди оваа работа, кој не чита весници не се информира, а кој чита се дезинформира, пишува Рама.