Изборот на Трамп треба да биде лекција за Европа
Објавено во: Свет 11 Ноември, 2016
„Изборот на Доналд Трамп за претседател на САД е важен настан и лекција за Европа, но е премногу рано да се утврди дали ЕЦБ треба да дејствува во име на стабилноста на пазарите“. Ова е ставот на Беноа Квери, член на Извршниот совет на Европската централна банка
„Ова треба да биде лекција за Европа - во свет каде што изненадувањата се зголемуваат, Европа треба да ја контролира својата судбина“, категоричен е Квери.
„За да биде Европа силна во однос на безбедноста и одбраната, таа треба да има силна економија. А за да биде економијата силна, треба во секоја земја да се спроведат реформите, а Еврозоната да функционира подобро“, објасни тој.
Квери додаде дека нестабилноста на пазарите треба да се избегнува, но засега обновата на Еврозоната зема замав.
Во меѓувреме, во САД почнаа масовни протести против изборот на Доналд Трамп за претседател. Повеќе од 860 илјади државјани потпишаа петиција дека сакаат Хилари Клинтон да биде прогласена за претседател на САД.
Доналд Трамп ги смета протестите како многу неправедни. „Имав многу отворени и успешни претседателски избори. Сега професионални демонстранти, поттикнати од медиумите, протестираат. Многу неправедно!“, напиша Трамп во неговиот профил на социјалната мрежа Twitter.