Изетбеговиќ: Европа не им припаѓа само на христијаните

Добивај вести на Viber

Бакир Изетбеговиќ, член на претседателството на БиХ денеска изјави дека Европа не им припаѓа само на христијаните. 

Вели дека христијанството дошло во Европа неколку векови пред Исламот, и тоа од исто место. Изетбеговиќ ова го кажа на трибина за екстремизмот и исламофобијата одржана денеска во Сараево, јави новинската агенција Танјуг.

Изетбеговиќ потсети дека екстремистите како што се членовите на ИД се апсолутно малцинство во исламскиот свет.

„Кога би го отстраниле културниот елемент и идентитетот што во Европа го донеле муслиманите, тогаш Европа не би била таква каква што денес ја знаеме. Тој придонес се гледа во математиката, астрономијата, хемијата, биологијата, филозофијата, музиката“- изјави Изетбеговиќ.

Изетбеговиќ, чиј татко беше водач на босанските муслимани за време на граѓанската војна, муслиманите во Европа мора да најдат одговор на исламофобијата која се изразува кон нив. Тој објасни дека исламските екстремисти, со своите напади, намерно даваат материјал за прикажување на муслиманите како терористи затоа што цел на Исламската Држава и сличните екстремистички организации е да предизвика војна меѓу муслиманите и остатокот на светот.

Изетбеговиќ вчера рече дека пред смртта неговиот татко Алија Изетбеговиќ на сегашниот претседател на Турција, Реџеп Таип Ердоган му оставил аманет да биде тутор на БиХ. По ова претседателот на Република Српска, Милорад Додик кажа дека Бакир на Ердоган на чување може да му го даде само имотот кој го поседува. Додик рече дека во БиХ живеат два христијански народи во чие име Алија никогаш не говорел ниту имал мандат да говори. 

Mедиумите пак пишуваа дека Изетбеговиќ му се додворува на Ердоган.