Јакимовски разрешен од Меѓународната мрежа за борба со тежок криминал

Добивај вести на Viber

Тони Јакимовски, еден од главните обвинети од СЈО во случајот „Тврдина“, повеќе нема да биде генерален директор на меѓународната мрежа која се бори со тежок криминал, дознава ТВ 24 од извори од МВР. 

Советот на СЕЛЕК предмалку едногласно со 11 гласа го разрешил од позицијата на која беше избран минатата година додека СЈО водеше истрага против него за уништување на системите со кои нелегално се прислушувало.

Делегацијата на чело со државниот секретар на МВР, Магдалена Несторовска утрово ја образложиле причината зошто Јакимовски треба да биде разрешен од директорското место во СЕЛЕК во Букурешт. Главните аргументи произлегле кога Врховниот суд одлучи да му го одземе и обичниот и дипломатскиот пасош, со што тој физички не може да биде присутен на состаноците и да ја води групата од 12 земји членки во регионот.

Јакимовски беше поранешен шеф во кабинетот на Јанкуловска и предложен за директор во СЕЛЕК лично од Митко Чавков минатата година кога беше министер за внатрешни работи и покрај фактот дека против него Специјалното обвинителство отвори истрага за сериозни кривични дела. Пред речиси два месеца СЈО бараше притвор и за Јакимовски, но Врховниот суд изрече алтернативна мерка и му ги одзеде пасошите.