Јанакиевски: СЈО не спроведува правда, туку политичка хајка против ВМРО-ДПМНЕ
Објавено во: Македонија 20 Октомври, 2016
Поранешниот министер за транспорт и врски, Миле Јанакиевски денеска реагираше на пресот на СЈО со писмено соопштение во кое тврди дека целокупната постапка при продажба на земјиштето за изградба на Сончев град е спроведена согласно законските и подзаконските прописи на Република Македонија.
„Апсурдно е што Јанева и СЈО товарат други лица и институции затоа што бил спроведуван законот и затоа што не извршиле кривично дело. Измислувањето случаи каде што сè е чисто и според Закон, како во конкретната пригода, е само уште еден јасен показател дека мисијата што СЈО си ја поставило пред себе не е да се спроведува правда, туку политичка хајка против ВМРО-ДПМНЕ и кампања во корист на други политички чинители во Македонија“, смета Јанакиевски.
Претходно и Министерката за Култура, Елизабета Канческа Милевска на пресконфернција посочи дека СЈО сакала да го оцрни целокупното работење на министерството за контрола и дека се работи за политичка пропаганда.
Таа рече дека СЈО уште еднаш докажало дека работи по инструкции дадени од страна на СДСМ и дека работи површно, без никаква анализа врз паушални претпоставки кои немаат никаква врска со вистината.
Инаку денеска СЈО отвори два нови случаи всо име „Топлик“ и „Тендери“ и во нив инволвираните сториле кривични дела со кои директно го оштетиле буџетот на РМ и грубо ги повредиле обврските од Законот за јавните набавки. Прво осомничени се токму Јанакиевски и Милевска.