Јанева бара и политичките партии да се гонат кривично

Добивај вести на Viber

Специјалната обвинителка, Катица Јанева денеска говореше на Регионалниот форум за политики за добро владеење и антикорупција, на тема „Справување со корупцијата и заробената држава во ЈИЕ“ во организација на Програмата на УСАИД.

Јанева истакна дека ефективната примена на механизми за заштита од злоупотреби ја определува и ефективноста на општеството кое се справува со корупцијата, како најсериозна закана за државата. Вклученоста на граѓанскиот сектор и неговата улога во борбата против корупцијата е од голема важност во обезбедување транспарентност и отчетност на институциите. 

Јанева смета дека е потребно актуализирање на кривичната одговорност на политичките партии како неопходна алатка во борбата против корупцијата Јанева рече дека кривичната одговорност теоретски е овозможена во Кривичниот законик на РМ, каде во член 122, став 6, и партиите се дефинирани како правни лица, но сепак во практиката тоа дело изостанува низ правосудниот систем.

- Последиците од коруптивното однесување ги плаќаат граѓаните кои не поседуваат механизми за контрола на Владата и институциите, но ние имаме обврска да обезбедиме адекватен институционален одговор на корупцијата, изјави Јанева.

Јанева смета дека се покажува неопходно „да се вратиме и на колективната одговорност, затоа што не ретко, одговорно лице врши злоупотреба во име и во корист на политичка партија, па оттука и неопходноста да може да одговараат и политичките партии“.