Јанева: Истражителите ќе дежураат во УБК додека да дојде експертот
Објавено во: Македонија 21 Октомври, 2016
Дел од истражителите уште се во УБК и ќе дежураат додека не дојде експертот во просториите на УБК, изјави специјалната јавна обвинителка, Катица Јанева во интервју на Топ тема на Телма.
Таа го објаснуваше одземањето на материјалите од УБК за кое влегоа пред два дена во институцијата, и за што немаа соработка.
„Овој дел што го спроведовме со судска наредба е само дел, кој, како и на кој начин прислушувал во Република Македонија како што реков и во првата изјава во средата. Нашиот мандат е тоа, да утврдиме кој, како и на кој начин прислушувал во Република Македонија во периодот од 2008 до 2015 година. Имаме мандат да испитуваме дали и од кого се направени финансиски криминали со прислушуваните разговори. Од оние кои се објавени од опозицијата и оние кои не се објавени, а се доставени од опозицијата“ – рече Јанева.
Таа вели дека иако немала соработка со УБК, сепак од почит кон институциите кои им припаѓаат на граѓаните не сакале насила да влезат во УБК.
„Начинот на кој постапува СЈО е посебен и стандардите се повисоки од стандардите на Јавното обвинителство“ – додаде Јанева.
Обвинителката кажа дека секое влегување во компјутерите остава траги.
Јанева појасни дека од март ги барале податоците, но не ги добиле.