Јункер: Има сериозен напредок на Македонија на патот кон ЕУ
Објавено во: Македонија 25 Февруари, 2018
Претседателот на Европската комисија, Жан Клод Јункер денеска во Скопје изјави дека забележал сериозен напредок на Македонија на својот пат кон ЕУ, којшто ја доближува земјата до Унијата.
Тој рече не пристигнал за да соопшти точен датум за почеток на преговорите, но напомена дека Македонија е на добар пат, и ако така продолжи за неколку месеци може да го добие очекуваното и препораката нема да биде условена.
„Не дојдовме да ви соопштиме датум, туку да ви кажеме дека сте на добар пат и ако продолжите по тој пат за неколку месеци ќе и дадете можност на Европската комисија на Советот да му препорача отпочнување на преговорите за приклучување“- рече Јункер.
Јункер, кој е придружуван од еврокомесарот за проширување Јоханес Хан, вели дека земјата постигнала голем напредок, но треба да преземе уште чекори на патот кон ЕУ.
На македонските власти им порача да го решат спорот за името со Грција.
Премиерот Зоран Заев истакна дека на средбата му укажал на претседателот на ЕК дека земјата вложува напори за унапредување на добрососедските односи.
„Затворањето на долгогодишните прашања не е едноставно. Охрабрени од Договорот за добрососедство со Бугарија продолживме со сериозна посветеност да работиме на решавање на проблемот што Грција го има со нашето уставно име“- рече Заев.
Тој рече дека градат мостови на соработка.