Како „Фич“ го оцени кредитниот рејтинг на Македонија?

Добивај вести на Viber

Меѓународната агенција за оценка на кредитниот рејтинг, „Фич“ го потврди постојниот кредитен рејтинг на Македонија ББ со негативен изглед, информираа од Министерството за финансии.

„Економскиот пораст за 2017 година е ревидиран на 2,3 проценти, но се оценува дека формирањето на Владата ќе резултира со подобрување на економските очекувања и активност и следствено ќе овозможи просечен пораст од 3,2 проценти во 2018-2019 година“- се вели во соопштението.

На потврдата на рејтингот влијаеле кредибилната монетарна и макропрудентна политика, кои овозможиле долготрајна стабилност на девизниот курс, ниска инфлација и стабилен економски пораст.

Се оценува дека планот „3-6-9“ на Владата за политики ориентирани кон членство во НАТО и ЕУ и враќање на довербата во независноста и транспарентноста на јавните институции, се соочува со значајни предизвици во имплементацијата.

„Тие се првенствено поврзани со ризици од можни несогласувања во владиното мнозинство, како и со ризици од опструкции од опозицијата, додека локалните избори ќе бидат првичен тест за напредокот на владата“- пишува во анализата на „Фич“.

Потврдата на негативниот изглед, ги одразува оценките на „Фич“ дека, и покрај формирањето на новата Влада, уште постојат политички ризици за ефективно водење и имплементирање на економските политики, повисок раст и напредок кон ЕУ.

Политичката криза минатата година го потроши кредитниот рејтинг на земјава. „Фич“ во 2016 година го намали рејтингот на Македонија во ББ од ББ+.