Како ГТЦ ја десеткуваше добивката?
Објавено во: Економија 08 Август, 2017
АД ГТЦ за првите шест месеци од годинава не може да се пофали со сјајни резултати иако полугодието од 2017 го завршува со минимален профит. Сепак, кога ќе се направи споредба со истиот период лани ќе се види драстично намалување на добивката која од 25 милиони денари е сведена само на 1,8 милиони денари.
Главната причина за големото намалување на профитабилноста може да се гледа во падот на бројот на купувачите, односно на нивните клиенти кои изнајмуваат деловен простор. Во првите шест месеци од 2016 година ГТЦ забележал раст од нешто над 7 милиони денари, за сега да отиде во минус гледано според оваа стапка. Исто така зголемени се и обврските према добавувачите за речиси 50% и во периодот јануари-јуни 2016 достигнале 15,7 милиони денари.
ГТЦ во првата половина на годинава има и мал пад на приходите кои вкупно изнесуваат 96,5 милиони денари или за 7 милиони помалку од истиот период лани. Од друга страна пак, расходите наместо да се намалат тие се зголемиле и така ГТЦ до 30 јуни „потрошил“ 99 милиони денари или речиси 11 милиони денари повеќе од лани.
Да потсетиме и дека во извештајот за првиот квартал од 2017 ГТЦ имаше речиси тројно намалување на добивката која изнесуваше 1,7 милиони денари со вкупни приходи од 50,4 милиони денари па така тој тренд продолжува и сега.
ГТЦ годинава влезе и во „историјата“ откако донесе одлука да ја распредели скромната добивка во дивиденда и исплати 0,61 денар по акциија. Ако продолжат со ваквото темпо на работење и 2017 ја завршат во „плус“ можеби дивидендата ќе надмине еден денар по акција,
Автор: Христијан Станоевиќ