Како му оди на „Скопски пазар“?
Објавено во: Економија 30 Ноември, 2017
Големата скопска трговска компанија во период од 4 години изгубила 60 отсто од своето пазарно учество, покажуваат приходите од продажба. Набавките за трговски стоки се намалени за повеќе од 70 отсто од 2014 година до сега
Приходите од продажба на големиот трговски ланец „Скопски пазар“ во првите девет месеци годинава паднале за 23 отсто во споредба со истиот период лани, покажуваат официјалните податоци што компанијата ги објави на Македонската берза.. Приходите од продажба до крајот на септември изнесуваат 395,2 милиони денари и во споредба со претходната година до крајот на септември се пониски за 115,2 милиони денари.
Во период од четири години, споредбата на податоци за периодот јануари – септември, покажува дека „Скопски пазар“ изгубил 60 отсто од своето пазарно учество. На крајот на септември 2014 година приходите од продажба изнесувале 958,9 милиони денари, а сега се пониски за 563,7 милиони денари.
„Скопски пазар“ во добивка благодание на останати оперативни приходи
Билансот за првите девет месеци покажува дека компанија има поголеми оперативни расходи од приходите од продажба. Оперативните расходи изнесуваат 407,4 милиони денари и во споредба со истиот период лани се пониски за 96,4 милиони денари. Приходот од продажби е за 12 милиони денари понизок од оперативните расходи. Сепак работата ја „вадат“ останатите оперативни приходи од кои „Скопски пазар“ инкасирал 51,7 милиони денари. И со тоа ги покрива оперативните расходи. Оперативната добивка на компанијата е 39,5 милиони денари и во споредба со истиот период лани е пониска за 19 отсто. Нето добивката за првите девет месеци изнесува нешто над 100.000 евра и во споредба со истиот период лани е пониска за 57 отсто.
За камати и слични расходи „Скопски пазар“ платил пола милион евра
Финансиските расходи на „Скопски пазар“ остануваат голем предизвик на оваа трговска компанија. По тој основ компанијата за девет месеци платила 31,4 милиони денари односно половина милион евра. Во споредба со лани тој трошок е намален за 3 отсто односно за 1 милион денари.
Р.Ф.