Карлес Пуџдемон и неговите соработници се предадоа на полицијата во Белгија
Објавено во: Свет 05 Ноември, 2017
Разрешениот каталонски лидер, Карлес Пуџдемон и четворица членови на неговата влада денеска се предадоа на полицијата во Белгија.
Судот има рок до утре изутрина да донесе одлука како ќе се дејствува по налогот за нивно апсење издаден од шпанските власти.
„Петте лица што ги бара Шпанија дојдоа сами во судската полиција во Брисел и беа лишени од слобода. Сите ќе бидат сослушани, по што истражен судија ќе треба да одлучи дали да го активира европскиот налог за апсење“- изјави Жил Дежемеп, портпарол на белгиско обвинтелство.
Пучдемон и неговите соработници заминаа за Белгија откако шпанските централни власти привремено ја суспендираа автономијата на Каталонија по референдумот за независност на регионот.
По референдумот за независност, тие се гонат за поттикнување на бунт, и им се закануваат и по 30 години затвор.
Разрешениот каталонски претседател, во четвртокот не се појави на распит во шпанскиот Врховен суд. Од Брисел порача, дека во Шпанија ќе се врати за регионални избори, кои ги распиша централната влада во Мадрид, откако и ја укина автономијата на Каталонија. Пучдемонт рече дека ќе учествува на изборите, и ги повика сите про-независни партии во Каталонија, да се обединат во голема коалиција.