„Катимерини“: Периодот од ноември до февруари ќе биде клучен за преговарачкиот процес

Добивај вести на Viber

Грчкиот весник „Катимерини“ пишува дека периодот од ноември до февруари ќе биде клучен за активирање на преговарачкиот процес за спорот со името меѓу Македонија и Грција, како и за постигнување прогрес по тоа прашање. 

Медијаторот Метју Нимиц, ќе биде мошне активен во овој период, имајќи ги предвид резултатите од изборите во Македонија, пишува весникот. 

„Настапот на Заев, кој од Западот се смета за умерен политичар, кој има капацитет да ја води земјата на патот кон европските и евроатлантските интеграции, ги изненади и најпрецизните аналитичари, кои предвидуваа одреден баланс на силите меѓу двете партии“ - пишува  „Катимерини“.

„Катимерини“ наведува дека резулатите од првиот круг од локалните избори во Македонија, на кои убедлива победа понесе коалицијата предводена од СДСМ на актуелниот премиер Зоран Заев, а голем пораз претрпе опозициската ВМРО-ДПМНЕ на Никола Груевски ќе бидат фактор за забрзување и напредок во преговарачкиот процес меѓу Атина и Скопје за решавање на спорот со името.

Политичките аналитичари велат дека резултатите од првиот круг од изборите, на кои СДСМ освои 37 општини, а ВМРО-ДПМНЕ три, ќе доведе до тоа меѓународните фактори да го забрзаат процесот за решавање на името.

Атина, додава весникот, го следи развојот на настаните во земјава и очекува дека реториката, која ја користат Заев и министерот за надворешни работи Никола Димитров, ќе соодветствува со практичните чекори што ќе ги преземаат за постигнување компромис за името.