Ќе има ли реизбор на судии или тоа е неизводливо?
Објавено во: Македонија 23 Јули, 2017
Голема конфузија внесе вицепремиерот за евроинтеграции Бујар Османи кој во интервју за Радио Слободна Европа тврди дека јавноста погрешно го протолкувала ветувањето за целосен реизбор на судии.
Погрешна е интерпретацијата дека Владата и новото парламентарно мнозинство ќе прават генерален реизбор на судии. Ова го изјави вицепремиерот за евроинтеграции Бујар Османи во интервју за Радио Слободна Европа. Тој објасни дека тоа би било во спротивност со препораките на Европската Комисија. Османи вели дека всушност со најавените реформи ќе се зголеми улогата на новиот Судски совет во дефинирање на постапките за избори или дисциплинирање на судиите.
„Дури една од мерките која е предвидена во планот 3-6-9 е анулирање на закон за верификација на факти за дисциплинирање на судиите, бидејќи тоа го сметаме како начин или инструмент за притисок, туку зголемување на улогата на Судскиот совет во тој дел, така што нема да има генерален реизбор на судии, туку воспоставување на систем со цел квалитетен избор на судии, кои ќе бидат независни и непристрасни во својата функција“, рече Османи.
Сепак, Османи не е доволно уверлив во своите изјави бидејќи во изминатите месеци сосема јасно беше укажано од сегашниот премиер Заев дека мора да се направат нови критериуми за реизбор на судиите кои потоа секако ќе имаат можност повторно да аплицираат, но исто така сите кои постапувале несовесно, нечесно или незаконски ќе нема што да бараат во судската фела.