Ќе се намали бројот на работници во градежништвото?

Добивај вести на Viber

Очекувањата за вкупните договори за градежни работи се поповолни, а очекувањата за бројот на вработени се дека ќе се намали во наредните три месеци.

Според оценката на раководителите на деловните субјекти од областа на градежништвото, индикаторот на доверба во четвртото тримесечје лани е зголемен за 0.2 процентни поени во однос на претходното тримесечје. 

Тој пораснал за 2.0 процентни поени во однос на истото тримесечје од 2015 година, покажуваат податоците на Државниот завод за статистика. 

Оценката за економската состојба во четвртото тримесечје од 2016 е поповолна во однос на претходното  тримесечје, а поповолна е и во однос на четвртото тримесечје од 2015 година. Оценката за сегашната состојба со порачки (договори) на нивните деловни субјекти е речиси на еднакво ниво како во претходното тримесечје,  а оценката за финансиската состојба е понеповолна во споредба со третото тримесечје од 2016 година.

Во наредниот период се очекува продажните цени да се намалат, a бројната состојба и квалитетот на  механизацијата и опремата во четвртото тримесечје од 2016 година се над нормалата.

Најголемо влијание на ограничувањето за подобрување на тековната градежна активност имаат следните фактори: зголемени трошоци за материјали со 18.9%, камати со 14.8%, конкуренцијата во секторот со 12.5% и нема побарувачка со 12.5%.