Коце Трајановски со амбиција за вечен градоначалник
Објавено во: Македонија 13 Септември, 2017
ВМРО-ДПМНЕ и официјално му ја даде поддршката на актуелниот градоначалник на Скопје Коце Трајановски за нов трет мандат по ред. Трајановски повеќе од деценија е во локалната власт бидејќи претходно беше градоначалник и на општина Гази Баба, па доколку успеа сега да победи ќе влезе во вечната листа на најдолговечни градоначалници.
- Неговите успеси и работа се видливи насекаде низ градот Скопје. Благодарение на посветената работа на господинот Коце Трајановски и тимот околу него се изградија и проширија редица булевари и улици, се подигнаа нови зелени појаси, паркови и велосипедски патеки. Се изградија две катни гаражи и дополнително се обезбедија нови паркинг места. Изградена и реконструирана водоводна мрежа од прилика 81.793 метри. Се изградија нови плоштади, а се изградија и реконструираа и детски градинки и училишта. Овие и уште стотина други проекти кои господинот Коце Трајановски ги направи во својот мандат придонесоа градот Скопје да прерасне во вистинска метропола која сега е поставена на мапата на туристички дестинации и која годишно е посетена од страна на десетици илјади странски туристи, посочија од ВМРО-ДПМНЕ при официјализирањето на кандидатурата на Трајановски.
Инаку опозицијата постојано го критукува градоначалникот за уништувањето на градското зеленило со сечата на дрвата, како и за големото загадување на Скопје кое доаѓа како резултат на дивата урбанизација без планско градење. Трајановски трпи критики и за бавните реконструкции на улиците и булеварите и хаосот во постапувањето на јавните претпријатија со земските инсталации.
На претстојните избори главен против кандидат на Трајановски ќе му биде Петре Шилегов од СДСМ.