Коѕиас: Не може во државите северно од нас да не функционираат демократските процеси

Добивај вести на Viber

Македонија и Албанија треба да разберат дека нужно е да почнат да функционираат демократски и да ги спроведуваат демократските принципи на Европската Унија, изјави шефот на грчката дипломатија, Никос Коѕиас, по Советот за надворешна политика на ЕУ.

Тој во изјава за грчката државна телевизија ЕРТ, истакна дека на Советот била изразена голема загриженост за политичката криза во Македонија и во Албанија.

Коѕиас објаснува дека главниот проблем е тоа што Македонија и Албанија ја гледаат ЕУ како финансиски спонзор и како можност да се учествува во еден моќен владејачки центар, а забораваат дека Унијата е систем со вредности и со демократија, кој бара неговите членки да се однесуваат соодветно и да ја следат културата на компромиси.

„Не може во државите северно од нас да не функционираат демократските процеси. Некои мислат дека ние треба да им олесниме на овие држави и да правиме отстапки за да им станеме подобри соработници. Објаснив дека ова не е проблемот. Проблемот е дека овие држави треба да разберат дека е нужно да функционираат демократски и тоа значи да имаат демократски став кон опозицијата, кон малцинствата, па дури и кон етничките малцинства“ – вели Коѕиас.

Коѕиас упати и апел до соседните држави на Македонија и на Албанија да не изразуваат јавно ставови за внатрешните политички проблеми во овие земји, односно да го следат примерот на Грција, која последниве две години, според него, не изразила ниту еднаш јавен став за внатрешно-политичките кризи во Македонија и во Албанија.