Кои се коментарите на Рама, Мета и Тачи за Законот за јазици?
Објавено во: Балкан 11 Јануари, 2018
Албанскиот премиер Еди Рама на Фејсбук напиша дека усвојувањето на Законот за употреба на јазиците во македонскиот Парламент претставува историско постигнување за Албанците, кој ја демократизира и зајакнува самата земја.
Албанскиот претседател Илир Мета кој е во посета на Љубљана, го поздрави донесувањето на законот за кој смета дека е значаен акт не само за Албанците, туку и за европската иднина на Македонија.
Усвојувањето на Законот за употреба на јазиците од страна на Собранието на Македонија го поздрави и официјална Приштина.
Според шефот на косовската држава Хашим Тачи, тоа е „високо демократско постигнување за соседната земја, која меѓу првите ја призна независноста на Косово“.
„Унапредувањето на политичките права на Албанците во Македонија гарантира многу поголемо граѓанско и етничко единство во соседната Република. Им честитаме на албанските граѓани за ова политичко, административно и културно постигнување“- напиша Тачи на својот Фејсбук профил.
Усвојувањето на Законот, наведува, е значаен чекор од Охридскиот договор кој уште повеќе ги зајакнува соживотот и европската перспектива на Македонија.
Поддржан од 69 пратеници, Законот за употреба на јазиците денеска е усвоен во Собранието.