Кој ќе го замени Ворен Бафет на чело на „Berkshire Hathaway“ компанија која ја води успешни 52 години?
Објавено во: Финансии 15 Септември, 2017
Во писмото до акционерите на Berkshire Hathaway од 2014 година Ворен Бафет напиша дека "идните извршни директори на легендарниот конгломерат треба да доаѓаат од внатрешните кандидати кои Бордот на Berkshire ги познава добро".
Големата меѓународна банка JPMorgan смета дека идентификувала најверојатен внатрешен кандидат.
Во новиот извештај аналитичарите на банката го посочуваат Грег Авел како најверојатен наследник на Ворен Бафет како иден извршен директор на инвестицискиот фонд Berkshire Hathaway.
Во моментов Авел раководи со енергетскиот бизнис на компанијата и е на соодветна возраст - 55 години, се вели во извештајот.
Во документот се наведуваат и честите пофалби кои Бафет ги упатува кон Авел.
Во писмото од 2014 година Бафет исто така пишува дека следниот извршен директор треба да управува со компанијата барем 10 години и дека не очекува од одборот да избере кандидат кој има веројатност да се пензионира на 65-годишна возраст, пишува Бизнис инсајдер.
И иако аналитичарите на JPMorgan го посочуваат Авел како најверојатен наследник, тие ја оставаат вратата отворена и за други можни кандидати.
На пример Аджит Џај, кој во моментов раководи со Berkshire Hathaway Reinsurance, исто е наведен како најверојатен кандидат, но според аналитичарите на банката проблем може да биде неговата возраст. Сега има 66 години.
Сепак, од банката истакнуваат дека тие не очекуваат нов директор на фондот да биде таму наскоро.
"Бафет не покажува никакви знаци на брзи промени и сè уште може да биде на чело на уште една деценија, всушност неговиот партнер, потпретседател Чарли Манџер, е 93 години и е исто така многу активен", се вели во извештајот.
Ворен Бафет го води Berkshire Hathaway 52 години и сега има 87 години.