Колкава добивка оствари „Макпетрол“ во првите девет месеци?
Објавено во: Економија 11 Ноември, 2016
Во периодот јануари-септември 2016 година „Макпетрол“ АД го подобри остварениот
деветмесечен финансиски резултат од претходната година за
цели 462,7 милиони денари и продолжи да ја зголемува
продажбата на енергенси на мало и тоа за 10%.
Во извештајниот период од 2016 година, „Макпетрол“ АД Скопје
оствари добивка пред оданочување во висина од 333,1 милиони
денари, односно добивка по оданочување во висина од 292,6
милиони денари, за разлика од минатата година, кога за истиот
извештаен период, Друштвото има остварено загуба во износ од
129,5 милиони денари, објави компанијата на страницата на Македонска берза.
Во овој период, „Макпетрол“ АД Скопје според податоците на берза во првите девет месеци оствари вкупен приход во износ од 12,2 милијарди денари кој е помал од минатогодишниот за 1,8 милијарди денари или 13,1 и.п.
Ваквото намалување на приходите се должи исклучително на намалувањето на цените на дериватите во однос на истиот период од минатата година бидејќи, истовремено, физичкиот обем на продажба на стоки и на услуги на „Макпетрол“ АД Скопје е зголемен.
Во истиот период, остварени се вкупни расходи во висина од 11,9 милијарди денари што преставува намалување во однос на минатата година за 2,2 милијарди денари или 15,9 и.п., во што најголем удел повторно има намалувањето на цените на дериватите.