Колку избирачи ќе гласаат во вториот круг од локалните избори?
Објавено во: Македонија 27 Октомври, 2017
За вториот круг на локалните избори во изводите на Избирачкиот список се запишани вкупно 833.716 избирачи, кои ќе можат своето избирачко право да го остварат на едно од 1517 избирачки места во 35 општини, соопштија од Државната изборна комисија.
„Постои изразен интерес и за набљудување на овие избори од страна на домашни и странски организации и медиуми. Државната изборна комисија за локалните избори издаде акредитации за набљудување на вкупно 5.101 домашни, 473 странски набљудувачи, 315 преведувачи и 20 странски новинари“- соопшти ДИК.
Утре, ќе гласаат луѓето кои се на издржување казна затвор или се во притвор. На гласачките места во 13 казнено поправни установи своето избирачко право ќе можат да го остварат 939 гласачи. Сите гласачки места во казнено поправните установи ќе бидат отворени во 7 часот и гласањето ќе трае до 19 часот.
Утре ќе гласаат и 8 гласачи кои се водат како внатрешно раселени.
Избирачките одбори утре ќе го спроведат гласањето на лица кои се болни или немоќни, или во куќен притвор, а до општинските изборни комисии доставиле известувања со соодветна документација. Во своите домови избирачкото право ќе го остварат 1.435 граѓани.