Колку сметки им откри СЈО на Груевски и Пешевски?
Објавено во: Македонија 22 Ноември, 2017
Никола Груевски, претседателот на ВМРО-ДПМНЕ, има 35 сметки во банка, а поранешниот вицепремиер Владимир Пешевски има 27 банкарски сметки, покажуваат податоците на СЈО.
Овие податоци Специјалното јавно обвинителство ги објави во обвинителните акти за случаите „Титаник“ и „Траекторија“, во деловите каде што за Груевски и Пешевски предлагаа да им се одреди мерката притвор.
„Обвинетиот Н.Г. поседува парични средства на сметки во шест деловни банки во Р. Македонија при што на 20 денарски сметки поседува вкупно 9.934.875,00 денари а на 14 девизни сметки поседува 46.726 евра. Исто така обвинетиот поседува и други девизни средства на 15 девизни сметки во различни банки, се наведува во обвинителниот акт за случајот „Титаник“, каде што Груевски е првообвинет“ - пишува во обвинението.
Во обвинителниот акт за случајот „Траекторија“, пак пишува дека Пешевски има 27 банкарски сметки, од кои 24 се активни.
По собраните податоци од деловните банки, се утврди дека обвинетиот В.П. во шест банки во Република Македонија поседува вкупно 27 банкарски сметки од кои 24 сметки се активни, на кои што што се наоѓа значителен износ на парични средства кои што би можеле да му послужат како средство со кое што би се реализирала неговата намера за бегство, пишува во обвинението за „Траекторија“.