Косово не било во опасност од терористички напади?
Објавено во: Балкан 20 Јуни, 2017
Косово никогаш не било во опасност од терористички напади, тврди советничката за политика на министерот за внатрешни работи во заминување Скендер Хисени, Шќипе Мјекиќи.
Како што јави дописникот на МИА, според неа, иако Косово не е во опасност како другите земји, сепак соодветните служби ги презеле сите неопходни безбедносни мерки.
„Што се однесува до тероризмот и екстремизмот, ние продолжуваме со идентични мерки и ангажирање како и до сега. Не располагаме со информации дека на територијата на Косово може да има вакви напади. Иако не сме во опасност како другите земји, ги имаме превземено сите неопходни мерки во коорднација со соодветните служби“- вели Мјекиќи.
Таа нагласи дека приоритет на Министерството за внатрешни работи е да се продолжи со активностите за спречување регрутација на лица кои се испраќаат на боиштата во Сирија.
Смета дека младите не треба да ја напуштаат земјата за да се приклучат на ИД.
По смртта на водачот на албанските џихадисти во Сирија, Косовецот Лавдрим Мухаџери, ИД се закани дека земјите од Балканот, вклучувајќи го и Косово, се можни цели на терористички напади. Тие се заканија и рекоа дека не го заборавиле Балканот.