Косово сопре 40 цистерни со „шкарт“ нафта од Албанија

Добивај вести на Viber

Царинската управа на Косово спречила влез на околу милион литри нафта која доаѓа од Албанија поради сомнителниот квалитет кој бил истражуван во три различни лаборатории од кои една е и од Македонија.

– Извршената анализа во царинската лабораторија, како и во две акредитирани приватни лаборатори во Косово, покажаа дека нафтата не ги исполнува критериумите предвидени во нашата земја, изјави  портпаролот на Царинската управа на Косово Адриатик Ставилеци за приштински „Зери“.

По трите извршени анализи, една од трите компании која ја нарачала нафтата „ХИБ Петрол“ инсистирала на друга анализа, по што Царинската управа на Косово испратила мостри од нафтата за анализа во Македонија.

Фадил Бајрами, претседател на здружението на бизниси кои се занимаваат со продажба и увоз на нафтени деривати, тврди дека блокираната нафта е неквалитетна и оти ова не е прв таков случај.

– Ова е уште една потврда дека се увезуваат неквалитетни нафтени деривати, а не дека тие се „расипуваат“ на бензинските пумпи. И оваа количина на нафта беше наменета за косовскиот пазар. Доколку не се контролираше на граница, таа ќе беше дистрибуирана по бензиските пумпи. Потоа кога ќе беа земени мостри на дериватот од пумпите тие ќе беа казнети по најмалку 10 илјади евра за неквалитет без нивна вина, посочува Бајрами.

Тој отркива дека блокираната нафта во Албанија пристигнала од Шпанија. Но, според него не е познато дали низ Албанија минала само транзит или била депозитирана пред да тргне за Косово.