Кумановската болница чека неонаталог да се грижи за новороденчињата
Објавено во: Македонија 17 Ноември, 2017
Кумановската болница доби еден од новите инкубатори кои владата ги набави за клиниките или одделенијата за гинекологија и акушерство низ македонските болници кои етапно ќе се достапуваат. Овој потег беше поздравен од страна на кумановската болница и нејзината директорика Снежана Захариева.
- Апаратот е нов, софистициран, со сите додатоци кои се потребни да претставуваат адекватна средина за едно предвреме родено бебе, а исто така ќе биде и олеснителна околност за Клиниката за гинекологија и акушерство и Клиниката за педијатрија, оддел за интензивна нега каде што се згрижуваат овие деца, кои по стабилизирање на состојбата ќе може да бидат вратени во нашата матична установа - изјави директорката на болницата Снежана Захариева.
Захариева изрази надеж дека на ваков начин ќе се надмине проблемот со смрттност на новороденчињата. Исто така беше посочена и дека на кумановската болница и е потребен дополнителен кадар, како и неонаталог бидејќи останал без ниту еден стручњак од оваа област, една докторка заминала во приватното здравство, а друггата се пензионирала. За новороденчињата се грижат педијатри, а се повикуваат и неонатолози од Скопје.
- Последните години тоа беше актуелен проблем, се надевам дека и со добра кадровска екипираност и добра опременост со апаратура ќе успееме да ги надминеме овие проблеми и да бидеме држава во која новроденчињата ќе бидат наша иднина - изјави Захариева.
Со овој инкубатор, вкупно во кумановската болница на овој оддел има пет инкубатори, а во Куманово годишно се раѓаат околу 1.400 деца.