Лавров: Апсурдно е да се тврди дека се мешаме во изборите во САД
Објавено во: Свет 12 Октомври, 2016
Рускиот министер за надворешни работи, Сергеј Лавров ги опиша како „апсурдни“ тврдењата дека неговата земја се меша во претседателските избори во САД, соопшти Си-Ен-Ен.
- Поласкан сме, се разбира, дека добиваме такво внимание, имајќи предвид дека сме регионална сила, како што не нарече претседателот Обама пред некое време, рече Лавров.
Во вторникот Белата куќа соопшти дека ќе одговори на наводните руски сајбер напади „пропорционално“.
- Ако тие решат да прават нешто, нека го направат. Но да се тврди дека Русија се меша во внатрешните прашања на САД, тоа е апсурдно“, прокоментира рускиот дипломат.
Москва се обидува да влијае на изборите во корист на Трамп, изјави Џон Подеста, шеф на штабот на Хилари Клинтон. Тој тврди дека е жртва на сајбер нападите, кои биле дело на руските служби, најверојатно со знаење на Трамп.
Подеста соопшти дека ФБИ го истражува случајот, како дел од големата операција поради хакерските напади врз компјутерите на Демократската партија.
Кандидатката на демократите за Белата куќа Хилари Клинтон поведе со 8% пред конкурентот Доналд Трамп по излегувањето на скандалозните снимки на милијардерот во кои ги навредува жените. Според студија на Ројтерс и институтот Ипсос, 45% од испитаниците ќе гласаат за неа, а 37% - за Трамп.
Американскиот претседател Барак Обама ги повика републиканците да ја повлечат поддршката за Доналд Трамп. На митинг Обама изјави дека поради грубите коментари на Трамп за жените не би го ангажирал дури ни на работа во продавница.