Македонците претпочитаат странски, пред домашни производи

Добивај вести на Viber

Македонските потрошувачи најмногу купуваат гуми за џвакање „Орбит" и пијат јогурт од домашниот производител „БиМилк“, покажа истражувањето на Агенцијата за истражување на пазарот и советување „Медиана" која проверувала кои се десетте најмногу користени брендови во Македонија, Србија, Хрватска и Словенија. Околу 59 % од Македонци се изјасниле дека најмногу сакаат да купуваат мастики „Орбит", а на листата исто така се и два производа на домашниот производител БиМилк, чиј јогурт е на шестото, а трајното млеко на десеттото место со 44, односно 34% од корисниците. Од хигиенските производи, од рафтовите во македонските продавници најмногу се земаат пастите за заби и четкичките „Колгејт" и тоалетната хартија „Перфекс". Кога бираат масло за јадење, Македонците се одлучуваат за своето, „Брилијант", кој е трет најкористен бренд во државата. На второто место на листата на најкористени брендови во Македонија е мајонезот „Полимарк". Во нашата држава се цени чоколадото, но не домашното, туку „Милка", која е на седмото место, како и „Кока-Кола", која е на претпоследното, деветто место. На прво место кај Србите и Хрватите е маслото за јадење и тоа домашното - во Србија "Дијамант", а во Хрватска "Звијезда". Словенците пак, најмногу го користат својот зачин "Маестро" кој го ставиле на првото место. Тие исто така ја ценат и хрватската "Вегета" која е на седмото место. На листата на најкористените брендови во Словенија исто така е и "Милка" чоколадата, но жителите на таа држава очигледно имаат различни навики од Македонците, па на нивниот список има и батерии, чај, ориз, кафе. Скалата на најмногу користени брендови во Македонија е составена врз основа на анкетирање на 2.119 лица на возраст од 10 до 64 години.