Македонија најверојатно без Лазаров до крајот на првенството
Објавено во: Македонија 22 Јануари, 2018
Повредата на капитенот на машката ракометна репрезентација Кире Лазаров има посериозен карактер и најверојатно ќе го спречи да настапува за Македонија до крајот на првенството иако повеќе детали ќе бидат познати по денешните лекарски прегледи.
Ова стравување го истакна македонскиот селектор Раул Гонзалез на вчерашната прес конференција по тешкиот пораз од Шпанија која целосно ја разби играта на македонската селекција која досега играше феноменално и оствари две победи и еден нерешен резултат.
„Одигравме цел натпревар катастрофално. Првите 15 минути губевме со седум разлика и тука ги загубивме сите шанси. Лазаров не можеше да игра, а знаеме тој колку е важен за нас. Сега имаме голем проблем поради неговата повреда, но ќе видиме во продолжение колку таа е сериозна“, изјави Гонзалез.
Следниот меч Македонија го игра против Чешка кој ќе биде еден од решавачките за конечниот пласман на првенството, а шансите за полуфинале и натаму се реални, но ќе биде многу тешко доколку Лазаров е спречен да го даде својот придонес врз чија игра се темелеа успесите досега.