Малезија го отповика својот амбасадор во Северна Кореја
Објавено во: Свет 20 Февруари, 2017
Малезија го отповика својот амбасадор во Пјонгјанг, по скандалот со убиството братот на Ким Џонг Ун - Ким Џонг-нам, пренесе BBC.
„Малезискиот амбасадор во Пјонгјанг беше отповикан во Куала Лумпур за консултации“, соопштија од Министерството за внатрешни работи во земјата.
Минатата недела Ким Џонг-нам беше убиен на аеродромот во Куала Лумпур, чекајќи го летот. Според властите во Малезија тој бил отруен. Полицијата трага по четворица осомничени.
Северна Кореја за моментот останува без коментар за случајот, иако Јужна Кореја продолжува да тврди дека Пјонгјанг стои зад убиството.
Во меѓувреме Малезија одби да го ослободи телото на Ким Џонг-нам без аутопсија, поради што амбасадорот на Пјонгјанг во Малезија ја обвини Куала Лумпур во „заговор за непријателски сили“ и прикривање на информации.
Од Министерството за надворешни работи на Малезија ги определија обвинувањата како неосновани и изјавија дека е нивна обврска да направат истрага за смртта на Ким Џонг-нам.
Убиството на полубратот на севернокорејскиот лидер ги затегна односите меѓу двете земји, иако Малезија беше една од ретките кои одржуваа дипломатски односи со Северна Кореја.