МЕПСО привремено го суспендира „ЕНГ Сервис Трејд“ од пазарот на електрична енергија
Објавено во: Мои пари 20 Септември, 2017
МЕПСО привремено ја суспендира компанијата „ЕНГ Сервис Трејд“ и таа од денеска до 1 ноември го губи правото да работи како снабдувач на пазарот за електрична енергија. Согласно со Правилата за пазар на електрична енергија (ППЕЕ) МЕПСО како организатор на пазарот на електрична енергија изрекува суспензија во услови кога компанијата не ги исполнува своите обврски кои во овој случај се создадени заради превземена, но неплатена електрична енергија. Суспензијата ќе биде продолжена до крај на ноември доколку во тој период снабдувачот не ги подмири обврските. Ако и до крајот на номеври не бидат подмирени обврските, МЕПСО согласно со ППЕЕ ќе го раскине договорот со компанијата снабдувач „ЕНГ Сервис Трејд“.
Новиот менаџмент на МЕПСО во период од еден месец ги превзеде сите располживи мерки: издаде опомени, активираше финансиска гаранција и на крај заради неподмирување на обврските привремено ја суспендираше компанијата снабдувач со електрична енергија согласно со ППЕЕ. Освен овие мерки, МЕПСО ги превзеде и сите расположливи законски мерки и активности за наплата на своите побарувања.
Значајно да се истакне е тоа што сите компании потрошувачи кои досега беа клиенти на „ЕНГ СЕрвис Трејд“ во изминатиов период обезбедија нови снабдувачи со електрична енергија. Со тоа се обезбеди редовно и непрекинато снабдување на тие компании со електрична енергија.
Долгот на снабдувачот „ЕНГ Сервис Трејд“ кон МЕПСО е направен во најголема мерка во првиот квартал годинава, но од засега непознати причини претходниот менаџмент не ги активирал инструментите за наплата на долгот за што МЕПСО ги извести надлежните државни инстанци.
Одлуката за суспензија на „ЕНГ Серис Трејд“ е објавена на корпоративната интернет страница на МЕПСО.