Мицкоски- Вучиќ: Македонија и Србија споделуваат повеќе заеднички вредности, но и предизвици за НАТО и ЕУ

Добивај вести на Viber

Република Македонија и Република Србија споделуваат повеќе заеднички вредности, но и предизвици поврзани со членството во НАТО и Европската Унија, беше кажано на средбата помеѓу лидерот на ВМРО-ДПМНЕ, Христијан Мицкоски денеска во Белград со српскиот претседател, Александар Вучиќ. 

Тие заклучија дека тука е потребна соработка и размена на искуствата како и еден отворен и транспарентен пристап од двете страни.

Соговорниците разменија мислења и ставови за повеќе актуелни теми врзани со регионалните предизвици, начините за интензивирање на соработката и стратешките интереси на двете држави.

Мицкоски посочи дека водењето на добрососедска политика, меѓусебното разбирање и почитување базирано на принципи и вредности преставува трајна добивка за регионот, а за тоа клучни се интензивните контакти и широко подадената рака за пријателство.

Тој нагласи дека е за градење на мостови на соработка, и дека иднината на Балканот е во прогресивните политичари кои умеат да ги заштитат државните интереси и да придонесат за градење на интегрирани општества.

Претседателот на ВМРО-ДПМНЕ го информираше својот соговорник и за состојбата во Република Македонија при што изрази загриженост за недостатокот на демократски капацитет на Владата за издржан дијалог, опасноста од политичкиот терор кој се спроведува врз политичките неистомисленици, како и немањето на сериозен концепт за важните прашања од сферата на надворешната политика каде клучно е заштитата на државните и национални интереси.

Мицкоски додаде дека наметнувањето на теми како Законот за јазици, немањето на коцнепт за економски развој, немањето на реформски правец и поразителните економски резултати придонесуваат за слабеење на стандардот на граѓаните, нешто што ја влече државата наназад, и ја одалечува од стратешките интереси за членство во НАТО и ЕУ.