Мицкоски: Јавноста чека одговори од Заев до каде е истрагата за корупција за двајца членови на Владата
Објавено во: Македонија 23 Февруари, 2018
Лидерот на ВМРО-ДПМНЕ, Христијан Мицкоски во видео-обраќање изјави дека сегашната власт нема преземено ниту еден чекор за сузбивање на корупцијата.
Вели дека јавноста чека одговори од премиерот Заев до каде е истрагата за корупција за двајца членови на Владата, која беше најавена.
„За 9 месеци оваа Влада нема превземено ниту еден единствен чекор за сузбивање на корупцијата која го разјадува општественото ткиво. Неефикасното и зависно судството останува рак рана, неефикасни институции, отсуство на професионалност во раководниот кадар на полицијата, исклучително корумпиран менаџмент во здравство, како и широко распротранета корупција на институциите кои се во непосреден допир со граѓаните се само мал дел од големата слика за тоа каква држава сме денес“- рече Мицкоски.
Тој вели дека иако Владата ветувала општество во кое нема место за корупција, сега Македонија е означена како најкорумпирана држава во Европа. Тој вели дека корупцијата е распространета во сите институции.
„Македонија не смее да се претвори во место каде граѓаните за да стигнат до една обична услуга која природно им припаѓа, мора да потплатат. Потребна е решителност, независност и волја да се сузбие оваа појава“- рече Мицкоски.
Maкедонија е најкорумпираната земја од Балканот, но речиси и во Европа, покажува новиот извештај на меѓународната невладина организација „Transparency international“ за 2017-та година.Податоците за нашата земја се споредливи со просекот на глобално ниво, па Македонија во ова рангирање има 35 поени и го дели 107-то место со Ерменија, Виетнам и Етиопија.