Милошоски тврди дека ДУИ барале и по 5.000 евра на Албанци за вработување по Рамковен
Објавено во: Македонија 22 Септември, 2017
Пратеникот од ВМРО-ДПМНЕ, Антонио Милошоски за време на дебатата за Законот за јазици во Собранието денеска изјави дека од ДУИ им барале по 4-5.000 евра на Албанци за вработување по Рамковен договор.
Тој смета дека Законот за јазици служи да потикнува национални и политички поделби.
„Во општина Чаир блиски луѓе на градоначалникот Меџити со години не одат на работа, а земаат плата. Зошто даночните обврзници Македонци, Албанци, Турци, Бошњаци кои работат и плаќаат даноци, да плаќаат за некој кој не може да им даде услуги како државен службеник “– рече Милошоски.
Пратеникот од ДУИ, Ејуп Алими, обвини дека за пет години додека бил во власта, Милошоски се збогатил, дури купил и приватен авион.
„Ако си храбар, дај ја изјавата за Мерко и Меџити надвор од собраниската говорница. Антонио, може ќе жалиш за приватниот авион што го имаш. Може ќе ти го конфискуваат. Сте студирале во странство, сте се дружеле со богаташи, но вие сте се збогатиле за пет години колку тие за пет генерации“- кажа Алими.
Спикерот Талат Џафери го опомена Милошоски да не ја злоупотребува говорницата и да не зборува надвор од темата за која се расправа во Собранието.