Министерот Фенекиу им се закани со откази на штрајкувачите во романските железници
Објавено во: Свет 16 Јануари, 2013
Романскиот министер за транспорт Релу Фенекиу изјави дека лицата, одговорни за денешниот штрајк на вработените во романските железници ќе платат со своите работни места поради настанатата ситуација.
- Виновниците за оваа ситуација ќе си заминат. Не знам кои се тие, кои ќе си заминат, но со сигурност ќе има такви, истакна Фенекиу на денешната прес-конференција.
Тој нагласи дека забавувањето во исплаќањето на платите, кое беше причина за штрајкот, трае само еден ден и даде уверување дека вработените ќе ги добијат платите најдоцна до утре.
Повеќе возови останаа на станиците во различни населени места во Романија изутрината, откако вработените во националната железничка компанија Че Фе Ре прогласија спонтан штрајк. Тие освен од ненавременото исплаќање на платите се незадоволни и од условите на работа. Штрајкот блокираше 138 возови на национално ниво.