Миновски најави евтини кредити за македонските компании
Објавено во: Финансии 23 Април, 2017
Министерот за финансии Кирил Миновски од Вашингтон најави дека преку Европската банка за обнова и развој на Македонија ќе и биде достапна нова кредитна програма наменета за мали и средни компании
Станува збор за програма на ЕБОР, која се однесува на поддршка на земјите од Западен Балкан во вкупен износ од 360 милиони евра, од кои Македонија има право на користење на 20 отсто од Фондот.
– Македонија веќе ја испрати апликацијата – акциониот план до Бордот на ЕБОР. Со оваа програма се решава еден дел од корпусот на прашања кои се поврзани со пристапот до финансии, кои се многу значајни за приватниот сектор врз кој почива македонската и речиси сите економии во светот, изјави Миноски.
Ефтините кредити за малите и средните претпријатија ќе се нудат во домашна валута, преку комерцијалните банки, директно преку ЕБОР или со кофинансирање 50-50 проценти ЕБОР со банките. Каматната стапка е повластена од 4 до 5 проценти.
За средствата од оваа програма ЕБОР не бара договор за заем или државна гаранција.
Евтини кредити за малите и средни претпријатија во Македонија беа пласирани и преку кредитната линија на ЕИБ во износ од 350 милиони евра.