МИОА почнува серија обуки за инспекторите ширум Република Македонија

Добивај вести на Viber

Од денес, 07 јули 2017 година, Академијата за обуки при Министерството за информатичко општество и администрација (МИОА) го започнува серијалот обуки за инспекторите ширум Република Македонија, со цел зајакнување на нивното познавање на специфични области од правото со кои тие се соочуваат во секојдневното работење. 

Серијалот обуки ќе се спроведе во соработка со Правниот факултет „Јустинијан Први“ како водечка високообразовна установа во соодветната сфера. Станува збор за првата ваква меѓуинституционална соработка, под покровителство на УСАИД, од која се очекува не само да овозможи сериозна надградба на знаењето на инспекторите туку и доближување на правната теорија и практика, односно креирање визија за подобрување на законодавството во иднина. Се разбира, основниот мотив за соработката и обуките воопшто е подобрувањето на секојдневниот живот на граѓаните на Република Македонија како и бизнис-климата во земјата.

Првите инспектори кои ќе се здобијат со шанса да бидат обучувани од еминентни професори од Правниот факултет „Јустинијан Први“ ќе бидат сите (вкупно 32) од Државниот управен инспекторат. Во текот на првата, дводневна обука на 07 и 08 јули 2017 година тие ќе слушаат предавања од Проф. д-р Борче Давитковски и Проф. д-р Ана Павловска-Данева, на теми поврзани со новините во Законот за општата управна постапка, применливоста на Законот за управните спорови во однос на решенијата на инспекторите, правата и одговорностите на инспекторите според Законот за инспекциски надзор, примената на Законот за прекршоците од страна на инпекторите и слично. На обуката како предавачи ќе се јават и претставници од Министерството за информатичко општество и администрација. Во светлина на нововоспоставената соработка обуката ќе се одржи на Правниот факултет „Јустинијан Први“, а секој инспектор ќе се стекне со сертификат потпишан од претставник на МИОА, Деканот на Правниот факултет „Јустинијан Први“ и УСАИД.