ММФ: Населението старее, возраста за пензионирање да биде во согласност со земјите од ЕУ

Добивај вести на Viber

Oд Меѓународниот монетарен фонд за Македонија велат дека е потребно возраста за пензионирање да се доведе во согласност со земјите од Европската унија за да може Фондот за пензионско и инвалидско осигурување во земјава да биде одржлив. 

Тие нагласуваат дека населението во земјата старее. Од ММФ тоа го поткрепуваат и со фактот дека во последните години бројот на пензионери се зголемил. 

„Ова, секако не е одржливо и нешто мора да се смени. Ако ги гледаме придонесите што се плаќаат за пензиско осигурување и возраста на која се пензионираат луѓето, тие се пониски во однос на земјите од ЕУ и пензискиот фонд за да биде одржлив потребно е возраста на пензионирање да се доведе во согласност со земјите од ЕУ“ - изјави денеска во Скопје шефот на Меѓународниот монетарен фонд за Македонија, Џасмин Рахман.

Вели дека треба да се врши усогласување на висината на пензиите само според инфлацијата, а не по 50% според трошоците на живот и платите. Препорачува да се затворат и дупките во законите кои овозможуваат чести пензионирања на помлади лица.

Смета дека Македонија со добра бизнис клима и повеќе работни места ќе ги задржи младите.

„Потребни се реформи во институциите и во образованието за вештините кои ги стекнуваат луѓето во текот на образовниот процес бидат соодветни на работните места кои се отвораат“ - вели Рахман.

За Македонија да постигне поголем економски раст, од ММФ наведуваат дека се потребни директни странски инвестиции, јака економија, структурни реформи во управувањето и правото и транспареност на институциите.

Светската економија во 2018 и 2019 година се очекува да порасне за  3,9%, во еврозоната во просек за околу 2%, додека земјите во развој за 5%. 

Во некои од земјите во ЕУ во пензија се оди на 65 или 67 години.