МРТВ: Нема да ја укинеме култната „Хихирику“, чекаме нова влада
Објавено во: Македонија 26 Март, 2017
Македонската радио телевизија соопшти дека најостро ја осудува изјавата на два члена на екипата на култната емисија на Македонското радио Хихирику дека е укината од Македонската радио телевизија.
„Оваа изјава ја сметаме како големо политикантство и понатаму нема да коментираме изјави со дневно политички карактер. Бренд емисијата на Македонското радио Хихирику ниту е укината ниту ќе се укине. Напротив, ќе продолжи со својот живот и понатаму. Поради целокупната состојба во државата и важечките закони, МРТ не е во можност да потпише авторски договори со екипата на Хихирику се до формирање на Влада на Република Македонија. Ова е поткрепено и со дописи од страна на Министерството за финансии. Ова е единствената вистина“, се наведува во соопштението на Македонска радио телевизија.
Претходно актерите Благоја Чоревски и Џокица Лукаревски на јавноста и открија дека емисијата „Хихирику“ по децении на постоење повторно и се заканува тргнување од радио етерот.