Мудис им го расипа расположението на Кинезите со намалениот кредитен рејтинг
Објавено во: Економија 24 Мај, 2017
Агенцијата за кредитен рејтинг Мудис реши да и додели на Кина за прв пат по 1989 година пониска оценка која од Аа3 е спуштена на А1 поради сомнежи за реформи во економијата, намалување на девизните резерви и зголемениот ризик за враќање на долговите.
„Кинеската финансиска моќ ќе паѓа во наредните години, а долгот ќе расте додека економскиот раст се забавува“, наведоа експертите од Мудис.
Кинеските власти предводени од министерот за финансии сметаат дека оценката на Мудис е нереална бидејќи е премногу претпазлива. Кина смета дека може успешно да се избори со сите економски предизвици и да одржи позитивни стапки на годишен раст.
Кинеската економија во 2016 година забележа најнизок раст од 1990 година наваму. Тој изнесуваше 6,7 проценти, додека прогнозата за годинава изнесува околу 6,5 %. Во првиот квартал од 2017 година стопанството на Кина со 6,9 проценти растеше изненадувачки бргу, но набљудувачите за остатокот на годината очекуваат тренд на забавување.
Со намалениот кредитен рејтинг се очекува на Кина да и се отежни задолжувањето на странските финансиски пазари. Засега одлуката на Мудис не доведе до сериозен пад на кинеските берзи, но постои загриженост.