На северната хемисфера денеска почнува пролетта
Објавено во: Свет 20 Март, 2017
На северната хемисфера на Земјата денеска почнува астрономската пролет.
Денешниот ден, 20 март, ќе биде првиот ден во годината со еднакво траење на сончевиот и ноќниот период во денот.
Пролетта ќе почне во 11 часот и 29 минути и ќе ја одбележи пролетната рамноденица, односно моментот кога замислената линија на сончевото „патување“ по небото ќе го пресече небесниот екватор, односно проекцијата на земјиниот екватор на небото.
Првиот пролетен ден во Македонија ќе трае 12 часа и 5 минути. Сонцето ќе изгрее во 5 часот и 39 минути, а ќе зајде во 17 часот и 44 минути. Месечината, која е во фаза на последна четвртина, ќе изгрее 18 минути по полноќ, а ќе зајде во 10 часот и 16 минути.
На првиот ден од пролетта времето во земјава ќе биде сончево и топло со минимална температура од 0 до 6 степени и дневни температури од 15 до 21 степен.
Наредниот викенд, ноќта меѓу 25-ти и 26 март, ќе почне летното сметање на времето, со тоа што стрелките на часовникот ќе се поместат еден час нанапред.
Следната рамноденица ќе се случи на 22 септември, кога на северната хемисфера ќе почне есента, а на јужната-пролетта.
На 21 јуни ќе биде најдолгиот ден во годината.