НА УДАР НА РЕБАЛАНСОТ: Тевдовски ќе ги крши непродуктивните трошоци

Добивај вести на Viber

Кои проекти ќе бидат на удар на ребалансот – никој во Владата засега не открива. Посочено е само дека ќе се кратат непродуктивните трошоци, но нема да се задира во проекти кои се отпочнати и чие евентуално запирање би било на штета на буџетот.

Министерството за финансии го финишира ребалансот на буџетот. Извори оттаму за Фактор велат дека сеуште се во тек одредени прекројувања на државната каса, иако најголемиот дел е веќе завршен.

Според најавите, ребалансот ќе се најде на владина седница во петок, по што ќе биде испратен во Собрание. Очекувањата се дека пред втори август ќе биде донесен.

Сепак, засега не се откриваат детали на што точно ќе има кратење, но јасно е дека тоа ќе биде кај оние трошоци кои се сметаат за непродуктивни.

Буџетот за годинава тежи 3,3 милијадри евра, додека  буџетскиот дефицит е планиран на 302 милиони евра.

Според податоците, од вкупно планираните приходи во буџетот во првитте пет месеци од годинава се прибрани 38,9 %. Потоа,  до мај годинава потрошен е 28,6 % од буџетскиот дефицит.

Најслаба реализација има кај капиталните инвестиции, односно за првите пет месеци реализирани се само 28,8% .Односно,  реализирани се само 126,3 милиони евра за капиталнни ивестиции од вкупно планираната сума за цела година која изнесува 438, 2 милиони евра.