Нафтата стабилно расте, горивата се поскапи
Објавено во: Економија 19 Октомври, 2016
Цените на нафтените фјучерси пораснаа поради поголемите изгледи за намалување на производството на залихи во САД, што оди во прилог на мислењето дека презаситеноста на пазарот со нафта полека се олабавува.
Американската „лесна“ нафта WTI за испораки во ноември е тргувана на ниво од 50,76 долари по барел на берзата во Њујорк, што е раст од 47 центи, додека северноморската сирова нафта „брент“ за испорака во декември е договарана по цена од 52,16 долари за барел, или за 48 центи повеќе отколку вчера, на лондонската берза .
Американските залихи на нафта веројатно паднале за 3,8 милиони барели во неделата заклучно со 14 октомври, се наведува во проценките на Американскиот институт за нафта, кој исто така предвидува пад на залихите од 2,3 милиони барели, но и раст на залихите на бензин од 900 000 барели.
На јакнењето на цената на нафтата, исто така влијаел слабиот долар, што ја прави нафатата евтина за купувачите кои користат други валути.
Цените на нафтата повеќе од две години се под притисок, бидејќи понудата константно ја надминува побарувачката. Сепак цените зајакнале за околу осум отсто откако ОПЕК кон крајот на септември постигна договор за намалување на производството за дури 700 000 барели дневно.
Инвеститорите го очекуваат состанокот на нафтениот картел следниот месец на кој ќе бидат разработени деталите за спроведување на договорот.
Одборот на ОПЕК претходно ќе се состане кон крајот на овој месец како би се обидел да ги реши разликите во ставовите на своите членки во поглед на производните квоти по земји поединечно.