Напаѓачот од Истанбул - државјанин на Киргистан

Добивај вести на Viber

Напаѓачот на клубот „Реина" е 28-годишниот Ахе Машрапов. 

Правосудните органи во Турција го утврдиле идентитетот на осомничениот за извршување на терористичкиот чин во ноќниот клуб „Реина" во Истанбул на новогодишната ноќ.

Напаѓачот е 28-годишниот државјанин на Киргистан. Фотографија од неговиот пасош е прикажана во етерот на турскиот државен тв канал TRT World.

Медиумите тврдат дека мажот влегол во Турција во ноември 2016 година, заедно со својата жена и дете. Тројцата биле пред тоа во Сирија.

Адресата им е регистрирана во градот Коња, токму таму е откриена сопругата на бегалецот обвинет за нападот и е уапсена.

Сторителот на атентатот е на слобода и турските власти продолжуваат да го бараат.

Безбедносни експерти сметаат дека напаѓачот од Истанбул е професионален убиец од високо ниво, пренесоа американските медиуми.

Цитиран е експертот во сферата на борбата против тероризмот, Абдулах Агара, кој истакна дека со своите постапки напаѓачот докажал дека е убиец и дека порано веќе пукал против луѓе.

Напаѓачот дејствува решително, ладнокрвно и знае како да ја постигне својата цел. Тој најверојатно пукал во зоните на конфликти, вели Агара.

Во социјалните мрежи се појави видео на кое напаѓачот во клубот си прави селфи на плоштадот Таксим во Истанбул.

Жртви на терористичкиот чин во клуб „Реина" се 39 лица, од кои 25 странци. Повредени се десетици при нападот. 

Одговорноста за нападот ја презеде терористичката група „Исламска држава".