Добивај вести на Viber
- Особено загрижува воведувањето на часовното балансирање, кое, според нашите проценки, ќе предизвика огромни загуби во работењето. Практично ќе плаќаме нешто што не сме го потрошиле - истакна Никола Ризов од „ФЕНИ Индустри“.
Часовното балансирање на потрошувачката на електрична енергија дополнително ќе ја влоши состојбата во металуршкиот сектор, драстично ќе ги зголеми трошоците и тоа до 12 милиони евра на годишно ниво, реагира денеска Здружението на црната и обоената металургија.
Претставниците од оваа гранка на прес-конференцијата во Стопанската комора предупредија дека сè повеќе се чувствуваат последиците од економската криза. Побарувачката продолжува да опаѓа заради што производството е намалено, а можни се и отпуштања на дел од вработените. Излез ќе се бара, рекоа, во дефинирањето краткорочни системски мерки на седница идниот понеделник.
- Ќе мора да се интервенира во цената на струјата како најголем производствен инпут. Но, особено загрижува воведувањето на часовното балансирање, кое, според нашите проценки, ќе предизвика огромни загуби во работењето. Практично ќе плаќаме нешто што не сме го потрошиле - истакна Никола Ризов од „ФЕНИ Индустри“.
Компаниите од црната и обоената металургија ќе бараат и одложување на завршните рокови за воведување на еколошките стандарди, како и 30 отсто од 100-те милиони евра што ги одобри Европската инвестициска банка.
Според нив, преземањето системски мерки за намалување на неповолните движења се подеднакво значајни на микро и на макро план.
- Како резултат на должничката криза во Европа производството на основни метали во првите пет месеци годинава бележи намалување за 8,6 отсто во однос на истиот период лани. Само во април, намалувањето на физичкиот обем на производството е 19 проценти, а во мај било 11,5 отсто, рече Стојмирка Тасевска од Стопанската комора.
Со оглед на тѕоа што во металургијата доминира производството на полупроизводи, делови и додатоци наменети за извоз, овој сектор, додаде Тасевска, е под силно влијание на случувањата на странскиот пазар.
Предвидувањата на Здружението се дека надворешната побарувачка до крајот на годинава ќе се намали за 50 проценти.
На седницата закажана за идниот понеделник, кога конкретно ќе се согледаат состојбите и ќе се дефинираат мерки за нивно надминување, се поканети и владини претставници.