Не успеа ни вториот референдум за рудникот Иловица
Објавено во: Македонија 17 Септември, 2017
Граѓаните на општина Ново Село не излегоа во доволен број на референдумот на кој требаше да се даде или не согласност за отворање на рудникот за злато Иловица во Штука, како и на потенцијално нови рудници за злато на територија на оваа општина.
Според информациите од активистите на „Здрава котлина“, излегле под 40 отсто од запишаните граѓани со право на глас, со што не е исполнет законскиот цензус референдумското изјаснување да добие легитимитет.
Граѓанските активисти кои се загрижени за штетните последици врз животната средина од употребата на цијанид за екстракција на рудата како и мега проектот кој предвидува изградба на огромна брана за хидројаловина велат дека без оглед на резултатите ќе продолжат да се залагаат рудникот воопшто да не се отвори и да не се доведе во ризик здравјето на луѓето и почвата за земјоделците.
Претходно неуспешен исто така беше и референдумот во Босилово.