Добивај вести на Viber
Сеуште нема договор меѓу „тројката “ меѓународни кредитори (ММФ, ЕК, ЕЦБ) и Грција. И покрај тоа што изминатиот викенд двете страни соопштија дека има напредок во преговорите, тие најверојатно ќе траат уште најмалку две седмици.
Грчкиот министер за финансии Јанис Стурнарас викендов по долгата средба со кредиторите соопшти дека преговорите ќе продолжат оваа седмица затоа што нема конечен договор за деталите за пакетот мерки за заштеда на 13,5 милијарди долари кој го бараат меѓународните кредитори. Тој истакна дека разликите што треба да се надминат се повеќе фискални отколку политички.
„Нема нерешени политички прашања, ова се едноставно преговори со тројката“, изјави Стурнарас и додаде дека меѓународните претставници денеска ќе присуствуваат на состанокот на Еврогрупата за да ги информираат министрите за финансии за разговорите во Атина.
Стурнарас денеска треба да го презентира пакетот мерки, според кој околу 9 милијарди евра заштеда ќе се имплементираат следната година, а 4,5 милијарди во 2014-та година.
Ако министрите не го одобрат ова поместување на целите, тројката најверојатно ќе се врати во Атина и ќе бара дополнителни штедења што дополнително ќе ја одложи исплатата на идната транша од кредитот за Грција.