Неправедно осудените бараат нови судски постапки

Добивај вести на Viber

Враќање на правдата преку повторување на судските постапки кои биле политички монтирани предлага Комитетот за заштита на правата со нов закон. Неговиот почесен претседател, Слободан Богоевски осуден во случајот „Агент“ вели дека законот нема да им ги врати годините во притвор на стотиците неправедно осудени, но ќе ја задоволи правдата.

„Сите вие почнувајќи од мене, стално во тој период се прашувавме  можна ли е правда во оваа држава, можно ли е враќање на одземените права. Нас никој не може да ни го врати  изгубеното здравје, никој не може да ги врати животите на луѓето кои починаа во притвор – затвор  или беа пуштени дома да умрат, за да не се расипе статистиката во Управата за  извршување на санкциите“, рече Слободан Богоевски - почесен претседател на Комитетот за заштита на правата.

Членовите на Комитетот осудени во предметите Шпион, Метастаза, Кампања, Ликвидација, Змиско око и многу други велат дека не бараат милост, рехабилитација или амнестија туку пред непристрасен суд да отпочнат нова постапка со која ќе ја докажат правдата.

Експертите се согласни дека без расчистување на предметите со ознака „политички монтирани“ не можат да се спроведат вистински реформи во судството.

„Најтежок во таа група закони, а тоа е  обнова на постапката. Таму се поставува прашање, всушност кои постапки.  Сите сметаат секогаш дека се неправедно осудени Тоа е огромен број и постои опасност да се заглавите и да ви пропадне проектот, ако тоа стане огромен број на зони“, рече Љубомир Фрчковски – професор.

„Без наоѓање на правда за тие случаи не може да се каже дека правдата на било кој начин ќе се воспостави во Република Македонија и не може да се воспостави  ни довербата кон судството  и кон државните органи се додека овие случаи кои што ги знаеме како монтирани случаи на наоѓаат правда“, рече Беса Арифи – професор.

И Фрчковски и Арифи велат дека извештајот на Прибе укажува на проблемите во правосудството во Македонија и е во линија со реформите кои се подготвуваат за деблокада на судството. За двајцата особено е добар предлогот за одговорност на судиите што е единствен начин преку кој ќе профункционира казнивоста во земјава.